ಈ ಆರ್ಯ ದ್ರಾವಿಡ ಅನ್ನುವ ಪರಿಕಲ್ಪನೆಯ ಹುಟ್ಟು ವಸಾಹತುಗಳ ಉದ್ದೇಶಕ್ಕೆ ಸೂಕ್ತವಾಗಿ ಹುಟ್ಟಿಕೊಂಡಿತ್ತು, ಅಥವಾ ಅವರೇ ಸೃಷ್ಟಿಸಿಕೊಂಡಿದ್ದರು. ಅವರ ಪ್ರಕಾರ, ಅಂದರೆ ಯೂರೋಪಿನ ಜನರ ಪ್ರಕಾರ ಪ್ರಪಂಚಕ್ಕೆ ಮನುಷ್ಯನಿಗೆ ಅನಿವಾರ್ಯವಾದ ಎಲ್ಲವನ್ನೂ ಅವರು ಮತ್ತು ಅವರ ದೇವರು ಮಾತ್ರ ತಂದಿದ್ದಾನೆ, ಅದೇ ರೀತಿ ಭಾಷೆಯನ್ನೂ ಅವರೇ ಭಾರತಕ್ಕೆ ತಂದು ಬಿಟ್ಟಿದ್ದು ಎಂಬುದನ್ನು ಸಾಧಿಸಲು ಬೇಕಾದಂತೆ ಆರ್ಯ ದ್ರಾವಿಡ ಸಿದ್ಧಾಂತವನ್ನು ರೂಪಿಸಿಕೊಂಡರು. ಜೊತೆಗೆ ಭಾರತದಲ್ಲಿನ ತಮ್ಮ ಆಡಳಿತಕ್ಕೆ ಅನುಕೂಲ ಆಗುವಂತೆ ಇಲ್ಲಿನ ಜನರನ್ನು ಮತ್ತು ಸಮಾಜವನ್ನು ಒಡೆಯುವ ಅಸ್ತ್ರವನ್ನಾಗಿಯೂ ಇದನ್ನು ಬಳಸಿಕೊಂಡು ಯಶಸ್ವಿಯಾದರು, ಈ ಎರಡು ಉದ್ದೇಶಗಳಿಂದ ವ್ಯವಸ್ಥಿತವಾಗಿ ವಸಾಹತು ಕಾಲದಲ್ಲಿ ತಯಾರಾದ ಈ ಸಿದ್ಧಾಂತ ಇಂದಿನ ವೈಜ್ಞಾನಿಕ ಯುಗದಲ್ಲಿ ಸೂಕ್ತ ಸಾಕ್ಷಿ-ಆಧಾರಗಳ ಕೊರತೆಯಿಂದ ಸತ್ತು ಹೋಗಿದ್ದರೂ ವಸಾಹತುಗಳ ದಟ್ಟ ಪ್ರಭಾವದಿಂದ ಬಿಡಿಸಿಕೊಳ್ಳಲಾಗದ ಕೆಲವರು ಇಂದಿಗೂ ಅದು ಸತ್ಯ ಎಂಬಂತೆ ನಂಬಿಕೊಂಡು ಕುಳಿತಿದ್ದಾರೆ, ಇಂಥ ಸುಳ್ಳನ್ನು ಇನ್ನಿಲ್ಲದಂತೆ ಬುಡಸಹಿತ ಕಿತ್ತೆಸೆಯುವ ಯತ್ನವನ್ನು ಹಲವಾರು ದಶಕಗಳಿಂದ ಆಧುನಿಕ ವಿದ್ವಾಂಸರು ಮಾಡುತ್ತಲೇ ಬಂದಿದ್ದಾರೆ, ಆದರೆ ಜನಸಾಮಾನ್ಯರ ಮನದಲ್ಲಿ ಆಳವಾಗಿ ಬೇರುಬಿಟ್ಟು ನೆಟ್ಟಿರುವ ಈ ಸುಳ್ಳು ಅಷ್ಟು ಸುಲಭವಾಗಿ ನಾಶವಾಗುವುದಿಲ್ಲ, ಆದ್ದರಿಂದ ಮತ್ತೆ ಮತ್ತೆ ಆಧುನಿಕ ಸಾಕ್ಷಿಗಳ ಆಧಾರದಲ್ಲಿ ಇದನ್ನು ಮತ್ತೆ ಮತ್ತೆ ಜನರ ಮುಂದೆ ಇಡುವ ಪ್ರಯತ್ನ ನಡೆಯುತ್ತಿದೆ, ಇಂಥ ಹೊಸ ಯತ್ನ ಬಹುಶ್ರುತ ವಿದ್ವಾಂಸರಾದ, ವೃತ್ತಿಯಿಂದ ವೈದ್ಯರಾದ ಶಿವ್ ಶಾಸ್ತ್ರಿಯವರು ಇದೀಗ ಮಾಡಿ ನಮ್ಮ ಮುಂದೆ ವಿಚಾರ ಮಂಥನಕ್ಕೆ ತೆರೆದಿಟ್ಟಿದ್ದಾರೆ, ಈ ಕೃತಿಯ ಹೆಸರು- 'ಟಿಯರಿಂಗ್ ಡೌನ್ ದಿ ಆರ್ಯನ್ ಇನ್ವೇಶನ್ ಮಿತ್' ಇದರಲ್ಲಿ ೧೫ ಅಧ್ಯಾಯಗಳಿದ್ದು ಒಂದಕ್ಕೊಂದು ಪೂರಕವೂ ಮುಂದಿನ ದಾರಿಯನ್ನು ತೋರುವಂಥವೂ ಆಗಿವೆ, ಅಲ್ಲಲ್ಲಿ ಓದುಗರಲ್ಲಿ ಹುಟ್ಟುವ ಶಂಕೆಗಳಿಗೆ ಅಲ್ಲೇ ಪರಿಹಾರ ತೋರಿಸುತ್ತವೆ. ಯೂರೋಪ್ ಭಾಷಾ ವಿದ್ವಾಂಸರು ಮೊದಲು ಆರ್ಯ ಸಿದ್ಧಾಂತವನ್ನು ಭಾರತದಲ್ಲಿ ಭಾಷೆಯ ಚಲನೆಗೆ ಸಂಬಂಧಿಸಿದಂತೆ ಪ್ರಯೋಗಿಸಿದರು, ಅಲ್ಲದೇ ಭಾರತಕ್ಕೆ ಮೊದಲು ಬಂದು ಸ್ಥಾಪಿತವಾದುದು ಸಂಸ್ಕೃತವೆಂದೂ ಅದು ಆರ್ಯ ಭಾಷೆ ಎಂದೂ ಇದು ಇಲ್ಲಿದ್ದ ದ್ರಾವಿಡ ಭಾಷೆಗಳನ್ನು ಮೂಲೆಗೆ ತಳ್ಳಿತು ಎಂದೂ ಸುಳ್ಳಿನ ಕತೆ (ಮಿತ್)ಕಟ್ಟಿದರು. ಈ ಭಾಷೆ ಯೂರೋಪ್ ನಿಂದ ಇಲ್ಲಿಗೆ ಬಂದಿದ್ದು ಹೇಗೆ? ಗಾಳಿಯಲ್ಲಿ ತೇಲಿ ಬರಲು ಸಾಧ್ಯವಿಲ್ಲ, ಹಾಗಾಗಿ ಅದನ್ನು ಒಂದು ಮೂಲದ ಜನ ಸಮುದಾಯ ವಲಸೆ ಬರುವಾಗ ತನ್ನೊಂದಿಗೆ ತಂದಿತೆಂದು ಕತೆ ಕಟ್ಟಿದರು, ಹಾಗೆ ಆ ಸಮುದಾಯ ವಲಸೆ ಬಂದ ಮಾರ್ಗವನ್ನು ಕೂಡ ರೇಖಿಸಿ ತೋರಿಸಿದರು, ಅವರು ಯೂರೋಪ್ ನಿಂದ ಮಧ್ಯಪ್ರಾಚ್ಯವನ್ನು ಹಾಯ್ದು ಅಲ್ಲಿಂದ ಕಂದಹಾರ್ ಮೂಲಕ ಸಿಂಧೂ ನದೀ ಪಾತ್ರದ ಬಳಿಯಲ್ಲಿ ನೆಲೆ ನಿಂತು ತಮ್ಮ ನಾಗರಿಕತೆಯನ್ನು ಸ್ಥಾಪಿಸಿ-ಸಿಂಧೂ ಬಯಲಿನ ನಾಗರಿಕತೆ- ಅನಂತರ ಇಂದಿನ ಭಾರತದ ವಾಯವ್ಯ ಭಾಗದಿಂದ ಭಾತರದೊಳಗೆ ಬಂದರು ಎಂದು ಬಿಂಬಿಸಿದರು, ಮೇಲ್ನೋಟಕ್ಕೆ ಇದು ಇರಬಹುದೇನೋ ಯಾಕೆಂದರೆ ಅವರು ಕಟ್ಟಿದ ಸುಳ್ಳಿಗೆ ಅಲ್ಲಲ್ಲಿ ಸಾಕ್ಷಿಗಳಿವೆ, ಕುರುಹುಗಳಿವೆಯಲ್ಲಾ ಅನಿಸುತ್ತದೆ, ಇದನ್ನೇ ಅವರು ಆಧುನಿಕ ಶಿಕ್ಷಣದಲ್ಲಿ ಎಲ್ಲ ಹಂತಗಳಲ್ಲೂ ತುರುಕಿ ಒಂದೇ ಸುಳ್ಳನ್ನು ಸಾವಿರಾರು ಬಾರಿ ಹೇಳಿ, ಸಾವಿರಾರು ಬಾಯಿಂದ ಹೇಳಿಸಿ ನಿಜ ಅನ್ನುವಂತೆ ಮಾಡಿಬಿಟ್ಟಿದ್ದಾರೆ, ಇರಬಹುದು, ಆ ಕಾಲಕ್ಕೆ ಲಭ್ಯವಿದ್ದ ವೈಜ್ಞಾನಿಕ ಅಥವಾ ತಾರ್ಕಿಕ ಆಧಾರದಲ್ಲಿ ಸಾಧ್ಯವಾದುದೇ ಅಷ್ಟು ಅಂದುಕೊಂಡರೂ ನಾವು ಇಂದು ಇಂದಿನ ತಾರ್ಕಿಕ ಹಾಗೂ ವೈಜ್ಞಾನಿಕ ಆಧಾರದಲ್ಲಿ ಇದು ಇಂದು ಸುಳ್ಳಾಗಿದೆ ಎಂದು ಭಾವಿಸಲು ಸಿದ್ಧವಿಲ್ಲದಿರುವುದು ಅಧ್ಯಯನಕ್ಕೂ ಗಂಭೀರ ಸಂಶೋಧನೆಗೂ ಮಾಡುವ ಅಪಚಾರವಾಗುತ್ತದೆ, ಇಂಥ ಸಾಕ್ಷಿ- ಪುರಾವೆಗಳನ್ನೂ ಹಿಂದಿನ ಕಟ್ಟು ಕತೆಯಲ್ಲಿನ ವಿರೋಧಾಭಾಸಗಳನ್ನು ಈ ಕೃತಿ ಕಣ್ಣಿಗೆ ರಾಚುವಂತೆ ಕಾಣಿಸುತ್ತದೆ.
ನಿಜ, ವಸಾಹತುಗಳು ತಮ್ಮ ಸುಳ್ಳಿನ ಕತೆಯನ್ನು ಎಷ್ಟು ವ್ಯವಸ್ಥಿತವಾಗಿ ಕಟ್ಟಿದರೆಂದರೆ ಒಂದು ಸುಳ್ಳಿಗೆ ಪೂರಕವೆನಿಸುವ ಪೂರಕ ದಾಖಲೆಯನ್ನು ಇನ್ನೊಬ್ಬರು ಒದಗಿಸುತ್ತ ಹೋದರು, ಹೀಗಾಗಿ ಆರ್ಯರ ವಲಸೆ ಎಂಬುದು ಸಿಂಧೂ ನಾಗರಿಕತೆಯ ಕುರುಹಿನ ಪತ್ತೆಯಿಂದ ಗಟ್ಟಿಯಾಗುವಂತಾಯಿತು, ಇದಕ್ಕೆ ಸಾಕ್ಷಿ ಎಂಬಂತೆ ಮತ್ತೊಬ್ಬ ವಿದ್ವಾಂಸ ಮ್ಯಾಕ್ಸ್ ಮುಲ್ಲರ್ ವೇದಗಳ ಉಲ್ಲೇಖವನ್ನು ಒದಗಿಸಲಾರಂಭಿಸಿದ, ಇವೆಲ್ಲ ಸೇರಿ ಒಂದು ಕಟ್ಟು ಕತೆ ನಿಜವೆನಿಸುವಂತೆ ಆಯಿತು. ಈ ಸುಳ್ಳನ್ನು ಇದೇ ಮಾರ್ಗದಲ್ಲಿ ಪರಸ್ಪರ ಪೂರಕವಾದ ಆಧಾರಗಳ ಬುನಾದಿಯ ಮೇಲೆ ಇಂದು ಛಿದ್ರಗೊಳಿಸುವ ಯತ್ನ ನಡೆಯುತ್ತಿದೆ, ಇದು ವ್ಯವಸ್ಥಿತವಲ್ಲ, ವಿಜ್ಞಾನ ನಿಷ್ಠ ಗಂಭೀರ ಸಂಶೋಧನಾ ಫಲಿತಗಳ ಹಿನ್ನೆಲೆಯಲ್ಲಿ, ಯಾರೋ ಏಕೆ? ಸ್ವತಃ ನಾನು ಈ ಕೃತಿಯನ್ನೂ ಇದಕ್ಕಿಂತ ಮುಂಚೆ ಆಧುನಿಕ ಡಿ.ಎನ್.ಎ. ಆಧಾರಿತ ಅಧ್ಯಯನ ಆಧಾರದಲ್ಲಿ ಭಾರತದ ಕಡೆ ಮಾತ್ರವಲ್ಲ, ಇಂದು ಪ್ರಪಂಚದಲ್ಲಿ ಅಸ್ತಿತ್ವದಲ್ಲಿರುವ ದ್ರಾವಿಡರೆನ್ನಲಾದವರೂ ಸೇರಿ ಎಲ್ಲರೂ ಸವಾನ್ನಾ ಬಳಿಯ ಮೂಲವೊಂದರಿಂದ ಎಲ್ಲ ಕಡೆ ವಲಸೆ ಹೋದವರೇ. ಮೂಲತಃ ಎರಡರಿಂದ ಮೂರು ಲಕ್ಷ ವರ್ಷಗಳ ಹಿಂದೆ ಆಫ್ರಿಕಾದಿಂದ ಮನುಷ್ಯನ ಮೂಲ ರೂಪ ಹೋಮೋ ಎರಕ್ಟಸ್ ಜಗತ್ತಿನ ಬೇರೆ ಬೇರೆ ಕಡೆ ವಲಸೆ ಹೋಯಿತು, ಹೀಗಾಗಿ ಪ್ರಪಂಚಾದ್ಯಂತ ಎಲ್ಲರ ಡಿಎನ್ಎ ವಂಶವಾಹಿಗಳಲ್ಲಿ ಸಾಮ್ಯವಿದೆ ಎಂದು ಹೇಳಲಾಗಿದೆ. ಆದ್ದರಿಂದ ಭಾರತದ ಮೂಲ ನಿವಾಸಿಗಳು ದ್ರಾವಿಡರು ಎಂದೇ ಅದುವರೆಗೆ ನಂಬಿದ್ದ ನನ್ನ ನಂಬಿಕೆಗೆ ಆಘಾತವಾಗಿತ್ತು.
ಈ ದೃಷ್ಟಿಯಿಂದ ಇಂದಿನ ದ್ರಾವಿಡರು ಕೂಡ ಎಲ್ಲಿಂದಲೋ ಬಂದವರೇ ಆಗಿರುವ ಕಾರಣ ಇಂದು ದ್ರಾವಿಡರು ಅನಿಸಿಕೊಂಡವರು ಸ್ವಲ್ಪ ಮುಂಚೆ ಬಂದಿರಬಹುದು, ಆರ್ಯರೆಂದು ಕರೆಸಿಕೊಂಡವರು ಸ್ವಲ್ಪ ತಡವಾಗಿ ಬಂದಿರಬಹುದು. ಜೊತೆಗೆ ಆರ್ಯ ಸಿದ್ಧಾಂತಕ್ಕೆ ವಸಾಹತುಗಳು ಕೊಡುವ ಸಂಸ್ಕೃತದ, ವೇದಗಳ ಇತಿಹಾಸ ಸದ್ಯ ಐದು ಕೆಲವು ಸಾವಿರ ವರ್ಷಗಳಷ್ಟು ಹಿಂದೆ ಹೋಗುತ್ತದೆ, ಆದರೆ ಅವರು ಪ್ರತಿಪಾದಿಸುವ ಆರ್ಯರ ವಲಸೆ ಪ್ರಸ್ತುತ ಶಕೆಯ ಪೂರ್ವದ ಕೆಲವು ಸಾವಿರ ವರ್ಷಗಳ ಹಿಂದೆ ಮಾತ್ರ ಹೋಗುತ್ತದೆ. ಕೆಲವು ಸಾವಿರ ವರ್ಷಗಳಷ್ಟು ಮಾತ್ರ ಹಿಂದೆ ಹೋಗುತ್ತದೆಯಾದ ಕಾರಣ ಅವರ ಪ್ರತಿಪಾದನೆಯಲ್ಲೇ ವಿರೋಧಾಭಾಸ ಕಾಣುತ್ತದೆ, ಸಾಲದ್ದಕ್ಕೆ ಈ ವೇದಗಳು ಪ್ರಸ್ತುತ ಶಕೆಯ ಐದು ಸಾವಿರ ವರ್ಷಗಳಷ್ಟು ಹಳೆಯವೆಂದು ಸದ್ಯದ ಸಾಕ್ಷಿಗಳು ದೃಢಪಡಿಸಿವೆ, ಇಂಥ ಅನೇಕಾನೇಕ ವಿರೋಧಾಭಾಸಗಳು ಆರ್ಯದ್ರಾವಿಡ ಸಿದ್ಧಾಂತದಲ್ಲಿವೆ ಎಂಬುದನ್ನು ಈ ಕೃತಿ ಹತ್ತಾರು ದೃಷ್ಟಿಕೋನದಿಂದ ಸಾಧಿಸಿ ತೋರಿಸುತ್ತದೆ, ಹಾಗಂತ ಈ ಆರ್ಯ ದ್ರಾವಿಡ ಸಿದ್ಧಾಂತ ಕಪೋಲ ಕಲ್ಪಿತ ಎಂದೇ ಸಾಧಿಸಬೇಕೆಂಬ ಹಠಕ್ಕೆ ಈ ಕೃತಿ ರೂಪುಗೊಂಡಿಲ್ಲ, ಈ ಸಿದ್ಧಾಂತ ಸುಳ್ಳಿನ ಕಂತೆ ಈ ಎಲ್ಲ ಕಾರಣ ಮತ್ತು ಸಾಕ್ಷಿಗಳ ಹಿನ್ನೆಲೆಯಲ್ಲಿ ನೋಡಿ ಎಂದು ಸಮಾಧಾನದಿಂದ ವಿದ್ವಾಂಸರ ಮುಂದೆ ತೆರೆದಿಡುತ್ತದೆ. ಆದ್ದರಿಂದ ಈ ಕೃತಿ ಇದಕ್ಕಾಗಿ ಉಲ್ಲೇಖಿಸಿ ಪರಿಶೀಲಿಸುವ ವಿಷಯ ಅಥವಾ ಶಾಸ್ತçಗಳು ಒಂದೆರಡಲ್ಲ, ಪುರಾತತ್ತ್ವ, ಖಗೋಳ, ಮಾನವ ಶಾಸ್ತ್ರ, ಭಾಷಾವಿಜ್ಞಾನ, ಜೀವ ವಿಜ್ಞಾನ, ಪರಿಸರ ಶಾಸ್ತ್ರ, ಪಶುಪಾಲನೆ, ಆಧುನಿಕ ಗಣಕಯಂತ್ರ ಮಾಹಿತಿ ಶೋಧನೆ ಇತ್ಯಾದಿ ಇತ್ಯಾದಿ. ಜೊತೆಗೆ ಈ ಆರ್ಯ- ದ್ರಾವಿಡ ಸಿದ್ಧಾಂತ ಕುರಿತು ಲಭ್ಯವಿರುವ ಪ್ರಕಟಿತ ಗ್ರಂಥಗಳು ಹಾಗೂ ಲಿಖಿತ ದಾಖಲೆಗಳು ಪೂರಕವಾಗಿ ದುಡಿದಿವೆ, ಸ್ವತಃ ಲೇಖಕರೇ ಬಹುಮುಖಿ ವಿದ್ವಂಸರಾದ ಕಾರಣ ಇವೆಲ್ಲವನ್ನು ಅವರು ಸಮರ್ಪಕವಾಗಿ ಬಳಸಿಕೊಂಡಿದ್ದಾರೆ, ಒಟ್ಟಾರೆ ಕೃತಿ ಸ್ವರೂಪ ಹೇಗಿದೆ ಎಂದರೆ ಒಂದು ಸ್ಥಾಪಿತ ಜನಪ್ರಿಯ ಸುಳ್ಳನ್ನು ಅದು ಸುಳ್ಳೆಂದು ಸಾಧಿಸಲು ಅಥವಾ ಸತ್ಯ ಬೇರೆ ಇದೆ ಎಂದು ಪ್ರತಿಪಾದಿಸಲು ಒಬ್ಬ ಪ್ರಾಮಾಣಿಕ ನ್ಯಾಯವಾದಿ ನ್ಯಾಯಾಲಯದ ಮುಂದೆ ಏನೆಲ್ಲ ಕಷ್ಟಪಟ್ಟು ಸಾಕ್ಷಿ ಒದಗಿಸಬೆಕಾಗುತ್ತದೋ ಅದನ್ನೆಲ್ಲ ಇಲ್ಲಿ ಮಾಡಿದ್ದಾರೆ, ಒಟ್ಟಿನಲ್ಲಿ ಸುಳ್ಳನ್ನು ಸ್ಥಾಪಿಸಲು ನಂಬಿಕೆ ಹುಟ್ಟಿಸಿದರೆ ಸಾಕು, ಅದನ್ನು ಸತ್ಯವಲ್ಲವೆಂದು ಸಾಧಿಸಲು ಹೆಣಗಾಡಬೇಕಾಗುತ್ತದೆ ಎಂಬುದನ್ನು ಇದು ಮನಗಾಣಿಸುತ್ತದೆ. ಇದರಲ್ಲಿ ಯಶಸ್ವಿಯೂ ಆಗಿದೆ, ಆದರೆ ಇದರ ಸಂಪೂರ್ಣ ಯಶಸ್ಸು ಇದನ್ನೋದಿದ ಬಳಿಕ ನೀವು ಎಷ್ಟರ ಮಟ್ಟಿಗೆ ಒಪ್ಪುತ್ತೀರೆಂಬುದನ್ನು ಅವಲಂಬಿಸಿಲ್ಲ ಎಂಬುದು ಮುಖ್ಯ, ಏಕೆಂದರೆ ಇಷ್ಟಾಗಿಯೂ ನೀವು ಆರ್ಯ ದ್ರಾವಿಡ ಸಿದ್ಧಾಂತದಲ್ಲಿ ಹುರುಳಿಲ್ಲವೆಂದು ತಿಳಿಯಲು, ನಿಮ್ಮ ತಿಳಿವಳಿಕೆಯನ್ನು ತಿದ್ದಿಕೊಳ್ಳಲು ಸಿದ್ಧವಿಲ್ಲವೆಂದಾದರೆ ಅದು ನಿಮ್ಮ ಹೊರತಾಗಿ ಯಾರ ತಪ್ಪೂ ಅಲ್ಲ, ನೋಡಿ, ಮೊದಲು ಆರ್ಯ ಎಂಬುದನ್ನು ಭಾಷಾ ಸೂಚಕವಾಗಿ ಬಳಸಲಾಯಿತು, ಅದು ಎಂದಿಗೂ ಸಮುದಾಯ ಸೂಚಕವಾಗಲು ಸಾಧ್ಯವಿಲ್ಲ, ಉದಾಹರಣೆಗೆ ಸಂಸ್ಕೃತದಲ್ಲಿ ಮೂಲತಃ ಆರ್ಯ ಎಂಬ ಪದ ನಾಮಪದ, ಗುಣಸೂಚಿಯಾಗಿ, ವ್ಯಕ್ತಿನಿಷ್ಠ ಸ್ವಭಾವ ಸೂಚಕವಾಗಿ ಬಳಕೆಯಾಗುತ್ತದೆ, ಇಂದು ಆರ್ಯನೆಂದು ಹೇಳಲಾಗುವ ರಾಮನಿಗೂ ದ್ರಾವಿಡನೆಂದು ಪ್ರತಿಪಾದಿಸಲಾಗುವ ರವಣನಿಗೂ ಆರ್ಯ ಎಂಬ ಪದ ಸಮಾನ ಅರ್ಥದಲ್ಲಿ ಅವರವರ ಪತ್ನಿಯರೋ ಅಥವಾ ಅವರನ್ನು ಸಂಬೋಧಿಸುವವರೋ ಸೂಚಿಸಿ ಕರೆಯುತ್ತಾರೆ, ರಾಮನನ್ನು ಸೀತೆ ಆರ್ಯ ಎಂದರೆ ಮಂಡೋದರಿ ರಾವಣನನ್ನು ಹೇ ಆರ್ಯ ಅನ್ನುತ್ತಾಳೆ, ಇಲ್ಲಿ ಈ ಪದ ಸಮುದಾಯ ಸೂಚಕವಲ್ಲ, ಅಂತೆಯೇ ಈ ಆರ್ಯ ಪದಕ್ಕೆ 'ಅನ್' ಪ್ರತ್ಯಯ ಸೇರಿಸುವ ಮೂಲಕ ಮ್ಯಾಕ್ಸ್ ಮುಲ್ಲರ್ ಮೊದಲಾದವರು ಇದನ್ನು ಸಮುದಾಯ ಸೂಚಕವಾಗಿಸಲು ಯತ್ನಿಸಿದರು, ಭಾಷಾ ವಿಜ್ಞಾನದ ದೃಷ್ಟಿಯಿಂದ ಇದು ಕೂಡ ಸರಿಯಲ್ಲ, ಸುಂದರಿ ಎಂದರೆ ಆಕೆ ಒಬ್ಳನ್ನೇ ಕುರಿತು ಹೇಳುವ ಮಾತಾಗುತ್ತದೆ, ಇದಕ್ಕೆ ಸುಂದರಿನ್ ಅಂದರೆ ಇರುವವರೆಲ್ಲ ಸುಂದರಿಯರೆಂಬ ಅರ್ಥ ಬರಲು ಶಕ್ಯವಿಲ್ಲ, ಹೀಗೆ ಆರ್ಯ ಎಂಬುದನ್ನು ವ್ಯಕ್ತಿ ಸಂಬೋಧನಾ ಸೂಚಕ ವಿಶೇಷವಾಗಿ ಮಾತ್ರ ಸ್ವೀಕರಿಸಿದಾಗ ಅದರ ಅರ್ಥ ಎಲ್ಲ ಕಡೆ ಸೂಕ್ತವಾಗಿ ಸಲ್ಲುತ್ತದೆ. ಆಧುನಿಕ ಜೀವ ವಿಜ್ಞಾನ, ನೀರಾವರಿ ವ್ಯವಸ್ಥೆ ಮತ್ತು ಮಾನವಶಾಸ್ತçಗಳು ಪ್ರತಿಪಾದಿಸುವಂತೆ ಈ ಪ್ರಪಂಚದಲ್ಲಿ ಮಾನವ ಸಮುದಾಯದಲ್ಲಿ ಕೇವಲ ನಾಲ್ಕು ಜನಾಂಗಗಳಿವೆ (ರೇಸ್). ಅವೆಂದರೆ ನಿಗ್ರೋ, ಆಸ್ಟçಲಾಯ್ಡ್, ಮಂಗೋಲಾಯ್ಡ್ ಮತ್ತು ಕಾಕಸಾಯ್ಡ್, ಇವುಗಳನ್ನು ಮಾನವ ಸಮುದಾಯದ ಸಮಾನ ದೈಹಿಕ ಲಕ್ಷಣಗಳ ಆಧಾರದಲ್ಲಿ ಪ್ರತಿಪಾದಿಸಲಾಗಿದೆ, ಎತ್ರದ ದೇಹ ರಚನೆ, ಕೆಂಪು ಕಣ್ಣು, ಗುಂಗುರುಕೂದಲು, ಕಪ್ಪು ಚರ್ಮ, ಚಪ್ಪಟೆ ಮೂಗು ನಿಗ್ರೋ ಜನಾಂಗದ ಲಕ್ಷಣವಾದರೆ ಹಳದಿ ಛಾಯೆಯ ಚರ್ಮ, ಕಂದು ಅಥವಾ ಹಳದಿ-ಹಸಿರು ಬಣ್ಣದ ಕಣ್ಣು, ಕುಳ್ಳಗಿನ ದೇಹಾಕೃತಿ, ಕಪ್ಪು ಅಥವಾ ಕಂದು ಬಣ್ಣದ ಕೂದಲು ಮಂಗೋಲಾಯ್ಡ್ ಜನಾಂಗದ ಲಕ್ಷಣವಾಗುತ್ತದೆ, ಹೀಗೆ ಆರ್ಯ ಅನ್ನುವ ಜನಾಂಗವನ್ನು ಗುರುತಿಸಲಾಗಿಲ್ಲ, ಅದೊಂದು ಭಾಷಿಕ ವಿಂಗಡಣೆ ಅಷ್ಟೇ. ದ್ರಾವಿಡ ಅನ್ನುವುದನ್ನು ಕೂಡ ಇದೇ ದೃಷ್ಟಿಯಲ್ಲಿ ನೋಡಿದರೆ ಅಲ್ಲಿಯೂ ಅದೊಂದು ಜನಾಂಗ ಎಂದು ಪ್ರತಿಪಾದಿಸಲು ಸಾಧ್ಯವಾಗುವುದಿಲ್ಲ.
ಇಷ್ಟೆಲ್ಲ ಒಳಸುಳಿಗಳನ್ನುಳ್ಳ ಈ ಆರ್ಯ-ದ್ರಾವಿಡ ವಾದವನ್ನು ಆಧುನಿಕ ಕಾಲದಲ್ಲಿ ರಾಜಕೀಯದ ಉದ್ದೇಶಕ್ಕಾಗಿ ಬಳಸಿಕೊಂಡು ಮತ್ತಷ್ಟು ಗೋಜಲು ಉಂಟು ಮಾಡಲಾಗಿದೆ. ಭಾರತದ ದಕ್ಷಿಣ ಭಾಗದಲ್ಲಿ ವಿಶೇಷವಾಗಿ ಇದು ಸಮಾಜವನ್ನು ಒಡೆದ ಬಗೆ ಅಪಾಯಕಾರಿಯಾದುದು. ಆದರೆ ಕೆಲವರಿಗೆ ಮಾತ್ರ ರಾಜಕೀಯ ಲಾಭಕಾರಿಯಾದುದು. ಇಂದು ನಾವೆಲ್ಲ ಪ್ರಪಂಚಾದ್ಯಂತ ಒಪ್ಪಿಕೊಂಡ ಜೀವ ವಿಜ್ಞಾನದ ದೃಷ್ಟಿಯಿಂದ ಕೂಡ ಆರ್ಯರೆಂದು ಗುರುತಿಸಲಾಗುವ ಜನರ ಹಾಗೂ ದ್ರಾವಿಡರೆಂದು ಹೇಳಲಾಗುವ ಜಬರಲ್ಲಿ ಕಾಣಿಸುವ ವಂಶವಾಹಿಗಳೂ ರಕ್ತ ಮಾದರಿಗಳೂ ಒಂದೇ ಬಗೆಯವಾಗಿವೆ ಎಂಬುದು ಕೂಡ ಗಮನಾರ್ಹ, ಈ ಎಲ್ಲ ಆಧುನಿಕ ಸಾಕ್ಷಿಗಳಿಂದ ಇದೊಂದು ಸುಳ್ಳುಗಳ ಕತೆ ಎಂದು ಈ ಕೃತಿಯಲ್ಲಿ ಸಮರ್ಥವಾಗಿ ಪ್ರತಿಪಾದಿಸಲಾಗಿದೆ, ಈ ಕೃತಿ ಆರ್ಯ ದ್ರಾವಿಡರೆಂಬ ಭ್ರಾಮಕ ಕಲ್ಪನೆ ಹರಡಿರುವ ಭಾರತದಂಥ ದೇಶದಲ್ಲಿರುವ ಎಲ್ಲ ಸ್ಥಳೀಯ ಭಾಷೆಗಳಿಗೆ ಅನುವಾದಗೊಂಡು ಜನರಲ್ಲಿ ಜಾಗೃತಿಯನ್ನುಂಟುಮಾಡುವ ಅಗತ್ಯವಿದೆ, ಸದ್ಯ ಕನ್ನಡದಂಥ ಯಾವುದೇ ಕೃತಿ ಹೊರಬಂದಿಲ್ಲ. ಈ ಕೆಲಸಕ್ಕೆ ಲೇಖಕರು ಮನಸ್ಸು ಮಾಡುತ್ತಾರೆಂದೂ ಈ ಮೂಲಕ ಮಾನವ ಸಮುದಾಯಕ್ಕೆ ಸ್ವತಃ ವೈದ್ಯರೂ ಪಂಡಿತರೂ ಆದ ಶಾಸ್ತ್ರಿಯವರ ಹೊಸ ದಿಕ್ಕುಗಾಣಿಸುತ್ತಾರೆಂದು ನಂಬಬಹುದು. ಆದರೆ ಶತಮಾನಗಳಿಂದ ವಸಾಹತುಗಳು ಕಟ್ಟಿ- ಹರಡಿದ ಸುಳ್ಳಿನ ಸಾಮ್ರಾಜ್ಯ ತುಂಬ ಆಳವಾಗಿ ಬೇರೂರಿದ ಕಾರಣದಿಂದ ಇಂಥ ಪ್ರಯತ್ನಗಳು ಮತ್ತೆ ಮತ್ತೆ ನಡೆಯಬೇಕಾದ ನಡೆದ ಕೆಲಸ ಜನರಲ್ಲಿ ಹರಡಬೇಕಾದ ಅಗತ್ಯವಿದೆ ಎಂದಷ್ಟೇ ಇಲ್ಲಿ ಹೇಳಬಹುದು. ಈ ಕೃತಿಯನ್ನು ಕನ್ನಡದ್ದೆ ಆದ ಹುಬ್ಬಳ್ಳಿಯ ಸುಬ್ಬು ಪ್ರಕಾಶನ ಹೊರತಂದಿದೆ.
ಪುಸ್ತಕ ವಿವರ:
ಟಿಯರಿಂಗ್ ಡೌನ್ ಆರ್ಯನ್ ಇನ್ವೇಶನ್ ಮಿತ್
ಲೇ- ಡಾ. ಶಿವ್ ಶಾಸ್ತ್ರಿ
ಮೊದಲ ಮುದ್ರಣ ೨೦೩೧, ರಾಯಲ್ ೧/೪
ಬೆಲೆ- ೩೯೯, ಪುಟಗಳು-೨೦೮
